मेरी यारी ! मलाई एकदमै हतार छ

- भूपाल राई

जुलुसजस्तो जिन्दगी हाँकेर

हेर !

म तिम्रो ८४ लाख जुनीमा उपस्थित छु

 

तर माफ गर मलाई

म तिम्रो प्रेमको आरामदायी काउचमा बसेर

कुनै उत्तर–जन्मको भविष्यवाणी

पर्खिरहन सक्दिनँ

मलाई अफसोच छ

किनभने मलाई एकदमै हतार छ

 

सय–सय जुनीको तिम्रो भक्ति–लहरी

कुनै धुरन्धर वस्तादको स्वरमा गुन्जिएजस्तै

मेरो पनि जन्म–जन्मान्तर हुने भए

म छुट्याउने थिएँ, एउटा जुनी गीतलाई

अर्को जुनी छुट्याउँथेँ दुःखको सौन्दर्यलाई

छुट्याउथेँ तेस्रो जुनी मुक्तिको उज्यालोलाई

र अन्तिम जुनी तिम्रो प्रेमलाई

 

तर, अफसोच छ

मलाई एकदमै हतार छ

 

सक्छौ,

बन्द गर त्यो ८४ औँ योनीको लीला

च्यात दिमागबाट

आधा लेखेर पट्याइएको कागज

र माया गर, मेरो मायाको विज्ञानलाई

कि सबथोक मायाको न्युटन सिद्धान्त

र प्रणयशास्त्रको आइन्स्टाइन सूत्र

मैले यही जुनीमा परीक्षण गरिसक्नु छ

बाँचुन्जेल भूतका रसायन

र भविताका अणु–परमाणुहरु

मैले यही जिन्दगीले भोग्नु छ

 

धेरै गाँसहरु बैँसको हतारमा

या कुनै अनाशक्त हातमा

छाडेर हिँडेको छु

म त्यो दिनको पनि भोको छु

धेरै सासहरु अर्काको इच्छामा

अर्काकै छातीमा जो फेरेको छु

म त्यसको पनि भोको छु

सिंगै खोला धाएर मेट्न नचाहेको तिर्खा

सिंगै ब्रहमाण्ड पाएर चढ्न नसकेको चोमोलुङ्मा

यात्राको यस टाकुराबाट हेरिपठाउाछु

म त कहाँ हो ... कहाँ

झर्दै–झर्दै आइपुगेछु

 

अफसोच छ

मलाई साँच्चि नै हतार छ

 

हतार–हतारमै टिपेर हिँड्नु छ मैले

जुलुसबाट एउटा जिन्दगी

बदल्नु छ एकपछि अर्को स्टेसन

छुट्नु छ रेल

र हतार–हतारमै फेरि

हाँक्नु छ मैले अर्को जुलुस

पिउन नजानेर चोख्खै– बगिएको खोला

चढ्न नसकेर झन अग्लिएको चोमोलुङ्मा

र छाडेर हिँडेका युगीन भोकहरु

जसलाई गालेर दुई थोपा पदार्थमा

जम्मैजम्मै क्षतिको हिसाबस्वरुप

मैले यही जुनीमा रोइदिनु छ

 

यही जुनीमा लेखिसक्नु पर्नेछ मैले

दुःखको सौन्दर्यशास्त्र

ढलेका छन् आफ्नै आासुको धरहरामुनि

अनाम गाथाका शिरहरु

तिनलाई कसैगरी उठाउनु छ

लड्नु छ सघन लडाइँ अँध्यारो पृथ्वीसँग

र हल्लाउँदै मुक्तिको उज्यालो ग्रहमा

तिम्रो प्रेमको गुलाफी रुमाल

यही जुनीमा गाउनु छ मैले

सय–सय जुनीको गीत

 

विश्वास छैन मलाई

कुनै अर्को– अतिरिक्त जन्मको

हेर, एक दिनको मेरो एक डल्ला घाम

मेरै थाप्लोको क्षितिजबाट

अब उत्तरार्द्ध ढल्किसकेको छ

बिस्तारै साँझ पर्नै लागेको छ

र एकै छिनपछि तिमीलाई छाडेर

मैले फेरि घर फर्किनु छ

मेरी यारी !

त्यसैले मलाई हतार छ

मलाई एकदमै हतार छ । 

प्रकाशित: जेष्ठ २, २०७६