‘होचो हुँदाका फाइदा पनि’

- मनबहादुर बस्नेत

राष्ट्रिय टिमका मिडफिल्डर निराजन खड्का, २९ काठमाडौँमा जन्मिए । धनुषामा हुर्किए, फुटबल उफार्दै । धनुषाबाटै अन्डर १२ टोलीमा छानिए । ५ वर्ष राष्ट्रिय टिमबाट बाहिरै परे ।  अहिले पुन: मैदान छिरेका खड्काले आफ्नो पहिलो खेलमै साफ च्याम्पियनसिप प्रतियोगितामा भुटानविरुद्ध १ गोल गरे भने पाकिस्तानविरुद्ध गोल गर्न सघाए । खड्कासँगको कुराकानी :     

कम ब्याक गरेको पहिलो खेलमा गोल गर्नुभयो, अपेक्षा थियो ?

आफूलाई सक्षम प्रमाणित गर्छु भन्ने सोचेको पक्कै थियो । यस्तै नतिजाको अपेक्षा थियो ।

बीचमा कसरी राष्ट्रिय टिमबाट बाहिर रहनुभयो ? 

यसका थुप्रै कारण छन् । कसैकसैलाई मेरा जायज कुरा चित्त बुझेका थिएनन् । समय आएपछि जम्मै कुरा खुलस्त पार्छु ।

तर, यसले आफूलाई फाइदै भएको महसुस हुन्न ?

हो, राष्ट्रिय टोलीमा नअटाएपछि मैले आफ्नो ट्रेनिङ बढाएँ । दोब्बर–तेब्बर मिहिनेत गरेँ । परिणाम सबैसामु छ । यही बेला मूल्यवान पुरस्कार, उत्कृष्ट मिडफिल्डरको उपाधि पाएँ । थ्री स्टारका लागि ५ वटा ट्रफी जितेँ । यस घटनाले मेरो विश्वास उचाल्यो ।

२९ वर्ष पुग्नुभयो, कुन उमेरसम्म खेल्ने सोच छ ?

आफूलाई व्यवस्थित गर्ने हो भने अझै ५ वर्ष खेल्न सक्छु । म त आफ्नो खेललाई अहिले झन् धारिलो बनाउँदैछु ।

उमेरसँगै खेल शिल्पलाई कसरी धारिलो बनाउन सकिने रहेछ ?

निजी र व्यावसायिक जीवनलाई अनुशासनमा राख्न सक्नुपर्छ । खानपानमा ध्यान दिने र शारीरिक तन्दुरुस्ती कायम राख्ने हो भने सकिन्छ ।

त्यसरी व्यवस्थापन गर्न सम्भव छ ?

आर्थिक रुपमा चाहिँ गाह्रो छ । किनभने, हाम्रा खेलाडीको सेवा–सुविधा पुग्दो मात्रामा छैन । केही कुरामा त्याग गर्न सकियो भने असम्भव पनि होइन ।

नेपालको फुटबल नउक्सिनुको कारण खेलाडीको होचो बनाबट नै हो ?

एउटा कारण हो । तर, मुख्य होइन । नेतृत्व गर्ने  संस्थासँग फुटबललाई अगाडि बढाउने ‘भिजन’ हुनुपर्‍यो । होचोपनका पनि फाइदा छन् ।

कस्ता फाइदा ?

विश्वका महान फुटबलर लियोनल मेसी होचै छन् । होचो कदकाले छिटोछरितो टर्न, मुभ बनाउन सक्छन् । शारीरिक बनावट बदल्न मिल्दैन । बरु यसलाई सकारात्मक रुपमा लिएर आफूलाई तिखार्न सकिन्छ । यसका विधि सिक्नु, सिकाउनुपर्‍यो ।

समान शारीरिक बनावट भएको भारतले कसरी स्तर उकास्यो ?  

इन्टरनेसनल एक्सपोजर, लगानी र घरेलु लिग फुटबल बलियो भएकाले ।  हाम्रोमा लिग नै भरपर्दो छैन । मेरो १५ वर्षे करिअरमा फुटबल संघको आन्तरिक विवादका कारण ७ वर्ष लिग नखेली खेर गयो । म त प्यासनले मात्र अल्झेको हुँ । 

नेपाली फुटबल स्तर नउकासिँदा मनमा कस्ता कुरा खेल्छन् ?

दु:ख लाग्छ । हामी भारतीय फुटबलर निर्मल क्षत्री, सञ्जु प्रधान, विकास जैरु, रवीन गुरुङसँगै खेल्न थालेका हौँ । सम्झिन्छु, उनीहरु कहाँ पुगिसके, हामी जहाँको तहीँ । भारतमा सिंगो मुलुक फुटबलको पछाडि लागेको छ । हाम्रोमा कसैलाई वास्ता छैन । वास्ता गर्नेहरुका आफ्नै स्वार्थ छन् ।

प्रकाशित: आश्विन ११, २०७५

ट्याग: अचानक