खुल्यो तिब्बत छिर्ने बाटो

- नेपाल संवाददाता

हिमाली चुचुराबीच चिसो बतास चलिरहने बाटोमा तिब्बतबाट नेपाल छिर्नु संसारकै मनमोहक यात्रामध्ये एक हो । तर, विसं ०७२ को भूकम्पसँगै तेस्रो मुलुकका पर्यटकका लागि रोकिएको त्यस ‘क्लासिक’ मार्ग अब खुलेको छ । यो प्रतिबन्ध अहिलेलाई केरुङ–रसुवागढी मार्गमा फुकुवा गरिएको छ । यसअघि भने धेरैजसो कोदारी राजमार्गमार्फत तातोपानी हुँदै आवत–जावत गर्थे । धेरै पश्चिमा पर्यटकहरु नेपाललाई तिब्बत छिर्ने प्रवेशद्वार बनाएर सडकमार्गबाटै यो मार्गमा जान रुचाउँछन् । तर, व्यावहारिक रुपमा भने एक लेनको मात्र बाटो भएकाले टुर अपरेटर्सहरु अहिले नै प्याकेजहरु सार्वजनिक गर्न हिचकिचाइरहेका छन् । 

मालवाहक ट्रक गुड्ने बाटोसमेत त्यही भएकाले सहज यात्रा अझै सम्भव छैन । कमजोर तवरबाट बनाइएका सडक र पहिरो गइरहने कमजोर भूबनोट त छँदैछ । यसअघि पनि बेलाबेलामा छोटो सूचनाकै बीच केही समयका लागि तिब्बत प्रवेश रोकिने गथ्र्यो । त्यस रुटमा थुप्रैपटक यात्रा गरेका लेखक इड डग्लसले बेलायती पत्रिका द गार्डियनसँग भनेका छन्, ‘चीनले तिब्बतलाई खुला राखेको बताईकन पनि देखाउन चाहन्छ र यस्तै कठिन परिवेशभित्र धेरै पर्यटक नभित्रिऊन् भन्ने पनि चाहन्छ ।’ तर, केही माइलकै फरकमा एक हजार मिटरदेखि पाँच हजार मिटरको पास काटेर ४ हजार २ सय मिटरमा फैलिएको तिब्बती समथर भूभाग पुग्ने साहसिक यात्राले भने जुनसुकै बाहनामा पर्यटकलाई लोभ्याउन छाडेको छैन ।

प्रकाशित: आश्विन ९, २०७४