समाचार निर्माताहरू - २०७२ --- अथक धाविका

- नेपाल संवाददाता

वैशाख ०७१ मा फ्रान्सको चामोनिक्समा भएको वार्षिक मोन्ट ब्लँ म्याराथनको ८० किलोमिटरतर्फको अल्ट्रा म्याराथन (उच्च पर्वतीय क्षेत्रमा हुने दौड) उपाधि जित्दा नेपालमा धेरैलाई मीरा राई, २४, बारे थाहा थिएन । तर, १२ घन्टा ३२ मिनेटमा निर्धारित दूरी पार गरेर प्रतियोगितामा पहिलो भएपछि उनीबारे विश्वचाहिँ जानकार भइसकेको थियो ।

भोजपुरको दुम्मामा जन्मेकी मीराले ०७२ मा त झन् कमाल नै देखाइन् । जस्तो : असोजमा स्पेनमा सम्पन्न सालोमन प्रिनेउ अल्ट्रा म्याराथनमा उपविजेता बनेर आफूलाई थप प्रमाणित गरिन् । संसारकै उत्कृष्ट पाँच प्रतियोगिताभित्र पर्ने १ सय १० किलोमिटरको दूरीको यो दौड मीराले १३ घन्टा ४३ मिनेट ४१ सेकेन्डमै पार गरिन् । २४ माघमा हङकङमा सम्पन्न स्काई रनिङ एसियन च्याम्पियनसिप ५० किलोमिटरको दौड जितेर मीराले आफ्नो प्रख्याति बढाइन् । महिलातर्फ पहिलो भएकी उनले ट्रफीसँगै आठ हजार डलर पुरस्कार थापिन् । 

अक्सिजनको कमी हुने उच्च स्थानमा हुने दौड प्रतियोगितामा लगातारको जित हासिल गरेकै कारण मीरा अल्ट्रा म्याराथन खेल क्षेत्रमा अन्तर्राष्ट्रिय खेलाडीको सूचीमा परेकी छन् । उनले यस वर्ष आफू सहभागी १४ अल्ट्रा म्याराथन प्रतियोगितामध्ये आठमा स्वर्ण पदक जितिन् । ज्ञातव्य रहोस्, मीरा पूर्वमाओवादी लडाकू हुन् । र, सेना समायोजनका समयमा अयोग्य घोषित भएपछि खेल क्षेत्रमा लागेकी हुन् ।

प्रकाशित: वैशाख ८, २०७३