खेलकुद

बंगबन्धु गोल्डकप : टोली पुरानै

पवन आचार्य, आश्विन १५, २०७५

बंगबन्धु गोल्डकपको उपाधि रक्षा कठिन
पुरा पढ्नुहोस्

झारा टार्ने लिग

पवन आचार्य, आश्विन १२, २०७५

ललितपुरको सातदोबाटोस्थित अखिल नेपाल फुटबल संघ (एन्फा)  सभाहलमा १३ असोजबाट सुरु हुने सहिद स्मारक ए डिभिजन लिगको खेलतालिका सार्वजनिक हुँदै थियो । झन्डै आधा दशकपछि हुन लागेको लिगलाई लिएर सहभागी १४ वटै क्लबका प्रतिनिधि उत्साही थिए । ड्र सार्वजनिक हुँदा १३ असोजमा  हुने उद्घाटन खेलमा सेनाको त्रिभुवन आर्मी क्लब र न्युरोड टिम एनआरटीबीच प्रतिस्पर्धा तय भयो । लगत्तै मन्तव्य दिने क्रममा लिगका टेक्निकल डाइरेक्टर सञ्जीव मिश्रले उद्घाटन खेल एन्फा कम्प्लेक्स सातदोबाटोमा अपराह्न ३ बजे हुने तर त्यसपछिका खेल नेपाली राष्ट्रिय टोलीले बंगलादेशमा बंगबन्धु कप अन्तर्राष्ट्रिय फुटबलमा जनाउने सहभागितामा भर पर्ने बताए । यदि नेपालले बंगबन्धुमा भाग लिए लिग तालिका परिवर्तन हुने मिश्रको भनाइको क्लबका प्रतिनिधिहरूले प्रतिवाद गरे । पछि मिश्रले आफूहरूको काम टाइसिट ड्र गर्ने मात्रै भएको र लिगबारे अन्तिम र आधिकारिक निर्णय गर्ने अधिकार एन्फा कार्यसमितिमा रहेको बताएर उनीहरूलाई थामथुम पार्ने प्रयास गरे । लामो समयपछि हुन लागेको लिगमा देखिएको बेथितिको यो मात्रै उदाहरण होइन ।

लिग उद्घाटन खेलमा सहभागिता जनाउने त्रिभुवन आर्मीका ४ खेलाडी हाल राष्ट्रिय टोलीमा छन् । गोलरक्षक विकेश कुथु, डिफेन्डर सुमन अर्यालसँगै फरवार्डद्वय भरत खवास र नवयुग श्रेष्ठ पनि हाल क्लबको प्रशिक्षणमा छन् । तर, बंगबन्धुमा नेपालको सहभागिता निश्चित भए आर्मीको तयारीमा बाधा पुग्नेछ । आर्मीका प्रशिक्षक नवीन न्यौपाने राष्ट्रिय टोलीमा अटाएका खेलाडीबिना लिगको तयारी अपूरो हुने बताउँछन् । लिग सुरु हुने र राष्ट्रिय खेलाडी उपलब्ध नहुने हो भने टोलीको प्रदर्शनमा समस्या आउने न्यौपानेको तर्क छ । एन्फाले यसबारे आफूहरूलाई समयमै जानकारी नगराएको आरोप पनि क्लबका प्रतिनिधिको छ ।

न्युरोड टिम एनआरटीका महासचिव सुन्दर जोशी एन्फाकै गलत कार्यशैलीका कारण ४ वर्षपछि हुन लागेको लिगलाई लिएर क्लबहरूमा कुनै उत्साहको सञ्चार नभएको बताउँछन् । भन्छन्– “हामीसँगको छलफलमा बंगबन्धुले लिग प्रभावित नहुने भनिएको थियो । तर, खेलतालिका सार्वजनिक गर्दा मात्रै हामीले पत्तो पायौँ । निश्चित योजना नबनाउने टालटुले नीतिमा एन्फा छ । यसरी न फुटबल उँभो लाग्छ, न त क्लब र खेलाडीको भविष्य नै ।”

  एन्फाले ए डिभिजन लिगलाई हल्का बनाउने प्रयास गरेको उनी आरोप लगाउँछन् । “असोज १५ मा नेपालले बंगबन्धुमा सहभागिता जनाउने/नजनाउने कुरा पनि अन्तिम समयमा आएर छिनोफानो हुने हो र ? अन्तर्राष्ट्रिय प्रतियोगिता बच्चाले भाँडाकुटी खेलेजस्तो हो ?” उनी प्रश्न गर्छन् । लामो समयपछि हुन लागेको लिग ‘नखाउँm भने दिनभरिको सिकार खाऊँ भने कान्छाबाबुको अनुहार’ जस्तो भएको छ, क्लबहरूका लागि । बंगबन्धु प्रतियोगिताका लागि ब्रेक हुने लिग तिहारपछि मात्रै सुरु हुने भएकाले त्यतिबेलासम्म खेलाडीलाई के गर्ने, कहाँ प्रशिक्षण गराउने भन्ने बलियो आधार क्लबहरूसँग छैन ।

बेथितिबीच लिग

एन्फाले ३१ भदौमा पत्रकार सम्मेलन गरेर ए डिभिजन लिग असोज १३ देखि पुससम्म काठमाडौँमा आयोजना गर्ने जानकारी गरायो । रेलिगेसन नहुने यो वर्षको लिगमा १३ र १४औँ स्थान प्राप्त गर्ने टिमले आगामी वर्ष हुने सहिद स्मारक ए डिभिजन लिगमा १ र २ अंक घटाएर प्रतिस्पर्धा गर्नुपर्ने नियम एन्फाले लगाएको छ । त्यस्तै, उनीहरूलाई लिग तयारीका लागि एन्फाले प्रदान गर्ने रकममा पनि २ लाख र ३ लाख रुपैयाँ घटाइने जानकारी गराइयो ।

जबकि, गत भदौमा चितवनमा सम्पन्न एन्फाको विशेष साधारणसभामा १२ देखि १४औँ स्थान प्राप्त गर्ने टिमको क्रमश: १ देखि ३ अंक घटाइने र उनीहरूको तयारी रकममा पनि ५, ३ र २ लाख रुपैयाँ कटौती गर्ने निर्णय भएको जानकारी प्रवक्ता किरण राईले गराएका थिए ।

उनै राईले सातदोबाटोमा आयोजित पत्रकार सम्मेलनमा बोली फेर्दै भने, “विशेष साधारणसभामा क्लबहरू रेलिगेसनमा नपर्दा घटाइने अंक र रकमबारेमा छलफल भएको हो । तर, क्लबहरूले अन्तिम २ वटा टिमलाई मात्रै नसिहत दिनुपर्ने अडान राखेकाले निर्णय परिवर्तन भयो ।” विशेष साधारणसभाको निर्णय उल्ट्याइएको विषयलाई एन्फा नेतृत्वले लामो समयदेखि सञ्चालन नभएको लिगलाई ट्रयाकमा ल्याउन गरिएको बाध्यात्मक कदम भनेको छ । लिग समिति संयोजक विज्ञानराज शर्मा भन्छन्, “यो वा त्यो बहानामा लिगै नहुने अवस्था आउनुभन्दा कम्तीमा लिग हुने वातावरण त बनेको छ नि ।”

एन्फाको कार्यशैली र सोच परिवर्तनको नारा बोकेर अगाडि आएको कर्माछिरिङ शेर्पा नेतृत्वको टोली अहिले क्लबहरूसामु निरीह छ । कारण, चुनावका बेला परिवर्तन पक्षधर भएको दाबी गर्ने समूहले आफूतिर आकर्षित गर्न क्लबलाई विभिन्न प्रलोभन देखायो । त्यसैको कडीको रूपमा रेलिगेसन नहुने लिग सञ्चालन हुन लागेको हो । संसारमा नेपाल मात्रै एउटा मुलुक होला, जहाँ घटुवा नहुने लिग फुटबल आयोजना हुँदैछ । घटुवा र बढुवा लिगको मुटु हो । नेपालको हकमा लिगको मुटु गायब भएको छ ।

खेलाडी दर्ता र मैदान अभावमा लिगमा सहभागिता नै हुन नसक्ने अवस्था आएपछि एन्फाको पहलमा काठमाडौँ महानगरपालिकाले क्लबहरूलाई अस्थायी मैदान उपलब्ध गराउन राजी भयो । काठमाडौँको टुँडिखेलमा मच्छिन्द्र, संकटा, रानीपोखरी कर्नर टिम आरसीटी र न्युरोड टिम एनआरटीले प्रशिक्षण गर्दैछन् । त्यति मात्रै होइन, काठमाडौँका क्लबहरूलाई महानगरपालिकाले ९ लाख ३० हजार रुपैयाँ पनि उपलब्ध गराउने भएको छ । क्लबहरूले आफ्नो अभावलाई यतिखेर एन्फालाई प्रभावमा पार्ने अस्त्रका रूपमा प्रयोग गर्न थालेका छन् । त्यस्तै, एन्फाले लिग तयारी स्वरूप १४ वटै क्लबहरूलाई २० लाख रुपैयाँ उपलब्ध गराउँदै छ । फुटबलको सर्वोच्च प्रशासनिक निकाय फिफाको ‘फिफा फरवार्ड फुटबल डेभलपमेन्ट कार्यक्रम’ अन्तर्गत ए, बी र सी डिभिजन लिग सञ्चालन गर्न प्राप्त ६ लाख ८८ हजार अमेरिकी डलरमध्ये ए डिभिजन लिगका लागि ५ करोड ८० लाख रुपैयाँ खर्चिने एन्फा महासचिव इन्द्रमान तुलाधरको भनाइ छ । त्यसबाहेक प्रत्येक म्याच जित्ने क्लबलाई अतिरिक्त ५० हजार रुपैयाँ प्राप्त हुनेछ ।

पत्रकार सम्मेलनमार्फत आयोजना हुने फुटबल खेलको जानकारी दिँदै एन्फा पदाधिकारीहरू, ३० भदौ | तस्बिर : विवेक सुवेदी


घट्यो लिगको पुरस्कार रकम

चुनाव आउने बेलामा क्लबहरूसँगको छलफलमा हालका एन्फा अध्यक्ष शेर्पाले भनेका थिए, “हामीसँग लिग सञ्चालन गर्ने आकर्षक विधि र प्रक्रिया मात्रै होइन, पुरस्कार रकम पनि आकर्षक नै राख्ने योजना छ ।” चुनाव सकिएको ६ महिनापछि सञ्चालन हुन लागेको ए डिभिजन लिगमा पुरस्कारको रकम घटाइएको छ । यसअघिको ए डिभिजन लिग विजेताले ७५ लाख र राष्ट्रिय लिग विजेताले १ करोड रुपैयाँ हात पारेका थिए । तर, प्रथम पुरस्कारमा रकम कम देखिए पनि समग्रमा धेरै टोलीले राम्रै रकम पाउने एन्फा अध्यक्ष शेर्पाको तर्क छ । “पहिलोदेखि छैटौँ स्थानसम्मका टिमले पाउने रकमलाई जोड्ने हो भने यसअघि सञ्चालन गरिएको लिगभन्दा यसपटक धेरै रकम पुरस्कारमा खर्च हुनेछ,” शेर्पा भन्छन् ।

लिग विजेताले ५० लाख, उपविजेताले ३५ र तेस्रो स्थान हासिल गर्नेले २५ लाख रुपैयाँ प्राप्त गर्नेछन् । चौथो हुनेले १५, पाँचौँले ७ र छैटौँ हुनेले ५ लाख रुपैयाँ हात पार्नेछन् । व्यक्तिगत विधातर्फ उत्कृष्ट फरवार्ड, मिडफिल्डर, डिफेन्डर, गोलकिपर र उत्कृष्ट प्रशिक्षकलाई एक–एक थान मोटरसाइकल प्रदान गरिने अध्यक्ष शेर्पाले बताए । त्यसबाहेक प्रत्येक म्याचको म्यान अफ दि म्याचलाई नगद १० हजार रुपैयाँ पुरस्कार दिइने एन्फाले जनाएको छ । सहिद स्मारक ए डिभिजन लिग विजेताले एसियन कप २०१९ मा सहभागी हुन पाउनेछ ।

म्याच फिक्सिङको टाउको दुखाइ

घरेलु लिगमा म्याच फिक्सिङको टाउको दुखाइ एन्फाले झेल्दै आएको नियमित समस्या नै हो । अझ यसपटक रेलिगेसनमा नपर्ने भएपछि खेल मिलेमतोको संख्या बढ्ने अनुमान फुटबल पण्डितहरूको छ । तर, एन्फा अध्यक्ष शेर्पा अन्तिम २ मा आउने क्लबहरूले आगामी वर्ष अंक र लिग तयारीको रकम कम पाउने भएकाले म्याच फिक्सिङ नहुने तर्क गर्छन् । खेल मिलेमतो निरुत्साहित गर्न एन्फाले इन्टिग्रिटी विभागको निगरानीमा खेल सञ्चालनको तयारी गरेको छ । त्यसका लागि नेपाल प्रहरीका पूर्वडिआईजी सुदीप आचार्य इन्टिग्रिटी अफिसर नियुक्त गरिएका छन् । खेल हुने हल्चोकस्थित सशस्त्र प्रहरीको मैदान र एन्फा कम्प्लेक्स सातदोबाटोमा विशेष क्यामेरा जडान गर्ने एन्फाको योजना छ ।

कुनै पनि मुलुकको फुटबलको विकासलाई हेर्ने मापदण्ड भनेको त्यहाँ सञ्चालन हुने घरेलु लिग नै हो । लामो समय लिग नहुँदा त्यसको प्रभाव नेपाली राष्ट्रिय टोलीमा पनि परेको एन्फा कार्यसमिति सदस्यहरूले नै स्वीकार्दै आएका छन् । तर, गर्नका लागि मात्रै लिग गर्दा न त्यसले नेपाली खेलाडीको विकासमा कुनै टेवा गर्छ, न त एन्फाले भन्दै आएजस्तो फुटबलको व्यवसायीकरणमा मद्दत गर्नेछ । यसअघिको नेतृत्वले लिग गर्न नसकेको तर नयाँ नेतृत्व आएलगत्तै लिग गरेर देखायौँ भनेर आत्मरतिमा रम्नुबाहेक अब हुने लिगबाट पनि ठोस उपलब्धि हासिल नहुने देखिएको छ ।

पुरा पढ्नुहोस्

सेमिफाइनलमै सास्ती : साफ च्याम्पियनसिपमा कहाँ चुक्यो नेपाल ?

पवन आचार्य, भाद्र २८, २०७५

साफ च्याम्पियनसिपमा नेपाल सेमिफाइनलमा रोकिएको यो पहिलो पटक होइन ।
पुरा पढ्नुहोस्

१८ औँ एसियाड : अनि कसरी जोगियोस् लाज !

पवन आचार्य, भाद्र १७, २०७५

जकार्ता एसियाडमा प्याराग्लाइडिङतर्फ एक रजत
पुरा पढ्नुहोस्

एसियाडमा निराश

पवन आचार्य, भाद्र १०, २०७५

खेल संख्या थप्दा पदकविहीन
पुरा पढ्नुहोस्

१८ औँ एसियाड : भिजन 0

पवन आचार्य, भाद्र ३, २०७५

१८औँ एसियाडसम्म नेपालको केवल १ रजत, २२ काँस्य
पुरा पढ्नुहोस्

फुटबलमा रंगभेद

पवन आचार्य, श्रावण १४, २०७५

खेलाडीमाथि रंगभेदी र नस्लवादी आरोप–शृंखला
पुरा पढ्नुहोस्

नायक क्रोएसिया

पवन आचार्य, श्रावण ६, २०७५

फाइनल हारेर पनि सबैको मन जित्ने फुटबल टोली
पुरा पढ्नुहोस्

विश्वकप २०१८ : फ्रान्सविरुद्ध क्रोएसिया (म्याच प्रिभ्यु)

पवन आचार्य, असार ३१, २०७५

यी दुईबीचको खेल लुज्निकी रंगशालामा राति पौने ९ बजे सुरु हुनेछ ।
पुरा पढ्नुहोस्

विश्वकप २०१८ : इङल्याण्डविरुद्ध बेल्जियम (म्याच प्रिभ्यु)

पवन आचार्य, असार ३०, २०७५

यी दुई टिम सेन्ज्ट पिटर्सबर्गमा स्टेडियममा आज राति पौने ८ बजे भिड्दैछन् ।
पुरा पढ्नुहोस्

विश्वकप २०१८ : मस्कोमा महाभिडन्त

पवन आचार्य, असार २९, २०७५

२१औँ संस्करणको विश्वकप अन्डरडगको या महारथीकै ?
पुरा पढ्नुहोस्